Support 
Монгол Улсын Ерөнхий сайдын санаачилсан “Соён гэгээрүүлэх аян”-ы хүрээнд “ДАС ихэр” сан, Швейцарын хөгжлийн агентлаг хамтран “Монгол ардын Жангар баатарлаг тууль”-ийг хэвлэн гаргалаа. “Монгол ардын Жангар баатарлаг тууль”-ийг түгээн дэлгэрүүлэх, туулиар дамжуулан өсвөр үеийнхнийг монгол уламжлалаа хүндэтгэн дээдлэх, эх оронч үзэлтэй болгох зорилгоор Улсын нийтийн номын сангийн 376 салбар тус бүрт таван ширхэгийг бэлэглэлээ.
Туулийг Хувьсгалт тэмцлийн ахмад зүтгэлтэн, Ч.Лодойдамбын нэрэмжит шагналт, түүхч, ахмад зохиолч, Жангар, Гэсэр судлаач, Ардын аман билэгзүйч Д.Суръяа эмхэтгэн 1986 онд хэвлэхэд бэлэн болгосон ажээ. Тэрбээр 1910 онд Халимагт тод үсгээр хэвлэсэн 10 бүлэг, 1958 онд Өвөр Монголд хэвлэсэн 13 бүлэг зохиолыг эх болгон, Монгол Улсын олон аймаг, ястны дунд үе дамжин ирсэн тууль, үлгэр, домгийн хувилбаруудыг 60 гаруй жил судлан, 17 бүлэг, удиртгал, төгсгөл, тайлбарын хамт нэгэн боть болгон баринтагласан аж.
Тууль бэлэглэх ёслолын үеэр Монгол Улсын Ерөнхий сайд У.Хүрэлсүх хэлэхдээ “Монгол Жангар” тууль нь эвтэй найртай амьдрах, нөхөрлөх, эх нутгаа хайрлах, хамгаалах, эх оронч үзэлтэй болгох зэрэг хүмүүжлийн асар их ач холбогдолтой. Туулийг номын сангуудад хүлээлгэн өгч байгаа нь өсвөр үе, хүүхэд багачууд, олон нийтийг өв соёл, уламжлал, түүх, ёс заншлаа танин мэдэх, сэргээх, бахархах, гэгээрүүлэх ажлын эхлэл гэж онцолсон юм.
“Монгол Жангар” тууль нь ЮНЕСКО-гийн Монголын үндэсний комиссын “Яаралтай хамгаалах шаардлагатай соёлын биет бус өв”-ийн жагсаалтад бүртгэгдсэн байдаг. Монголчуудын үзэл санаа, соёлыг шингээсэн 300 гаруй монгол тууль зуунаас зуун, мянганаас мянган дамжин өвлөгдөн үлдсэн байна. Цаашид англи хэл рүү хөрвүүлж, монгол зан заншил, өв соёл, уламжлал, монгол аман зохиолыг дэлхийд түгээн дэлгэрүүлэх зорилго тавьсан аж.
