Даян дэлхийн байгаль орчны сан (GEF)-гийн долоо дахь удаагийн санхүүжилтээр Монгол Улсад хэрэгжиж буй “Дорнод Монголын хуурай хээрийн тогтвортой ландшафт, биологийн олон янз байдлын хамгаалал” (Дорнод хээрийн төсөл)-ийн үр дүнтэй танилцах семинар, аялалд олон улсын 20 гаруй төлөөлөгч оролцлоо.
Семинар, аялалд НҮБ-ын Хүнс, хөдөө аж ахуйн байгууллага (FAO), Дэлхийн байгаль хамгаалах сан (WWF), Байгаль хамгааллын олон улсын холбоо (IUCN), Дэлхийн газрын тогтвортой менежментийн олон улсын сүлжээ (WOCAT), Казахстан Улсын Хүнс, хөдөө аж ахуй яамны Газрын нөөцийн менежментийн хороо, Киргизстаны Бэлчээрийн төрийн бүс байгууллага, Монголын бэлчээр ашиглагчдын холбоо (МБАНХ)-ны төлөөлөгчид оролцсон. Тус багийн бүрэлдэхүүнд Монголын бэлчээр ашиглагчдын нэгдсэн холбооны удирдах зөвлөлийн дарга С.Гүррагчаа хамрагдлаа.
Төлөөлөгчид төсөл хэрэгжиж буй Сүхбаатар, Хэнтий аймгийн сумдад хэрэгжиж буй төслийн үр дүнтэй газар дээр нь танилцаж, үр өгөөж хүртэж буй орон нутгийн төр захиргааны байгуулага, иргэдийн төлөөлөлтэй уулзан, туршлага судаллаа. Тухайлбал, Сүхбаатар аймгийн Сүхбаатар суманд бий болсон хөдөө аж ахуйн хоршоонд суурилсан сүү, сүүн бүтээгдэхүүн боловсруулах үйлдвэр, хонь бордож, махны чиглэлээр үйл ажиллагаа явуулах засвар фермийн байгууламжаар зочилсон. Төслийн үр дүнд сэргээж буй бэлчээрийн талбайд мониторинг хийх үйл ажиллагаатай танилцаж, хүлэмжийн аж ахуй, газар тариалангийн жишиг төслүүдийн талбайд ажилласан байна.
Төслийн хамгийн гол зорилго нь доройтсон газрыг сэргээх, хамгаалах, бэлчээрийн зөв менежментийг нутагшуулах бөгөөд орон нутгийн газар зохион байгуулалтын нэгдсэн төлөвлөгөөг шинэлэг аргаар боловсруулан хэрэгжүүлснээр 800 гаруй мянган га доройтсон бэлчээрийн төлөв байдлыг сайжруулсан талаар төслийн менежер Т.Эрдэнэжаргал мэдээллээ.
