Гадаад хамтын ажиллагаа өргөжиж байна

Олон улсын газрын эвсэл (International Land Coalition буюу ОУГЭ)-ийн захирал Марси Вигода, Азийн бүс хариуцсан зохицуулагч Ану Верна болон ОУГЭ-ийн Глобал бэлчээрийн зохицуулагч Наташа Мару нар 2025 оны 8-р сарын 15-16-ны өдрүүдэд  Монголын бэлчээр ашиглагчдын нэгдсэн холбооны гишүүн байгууллага болох Төв аймгийн Өндөрширээт сумын бэлчээр ашиглагчдын холбоо болон “Мөөрс” бэлчээр ашиглагчдын хэсгийн үйл ажиллагаатай танилцлаа. Тус уулзалтыг сумын бэлчээр ашиглагчдын холбооны тэргүүн Ц.Оюун, бэлчээр ашиглагчдын хэсгийн ахлагч н.Бүрэнзэвсэг нар амжилттай зохион байгууллаа. Төлөөлөгчид малчин өрхийн аж байдалтай танилцаж малчдын малын тэжээл тариалах үйл явцтай танилцсан ба тус аймгийн Лүн сумын Адуунчулуун бэлчээр ашиглагчдын хэсгийн малчид болон Ногоон хэрэм, тэрбум мод үндэсний хөтөлбөрийн орон нутагт хэрэгжүүлж байгаа ажилтай танилцлаа.

Уулзалтаар  “Бэлчээр ба Нүүдлийн мал аж ахуй эрхлэгчдын Олон улсын жил” болон Цөлжилттэй тэмцэх тухай Нэгдсэн Үндэстний Байгууллагын Конвенцын талуудын 17 дугаар Бага хурал (COP 17) зэрэг томоохон арга хэмжээ манай улсад  зохион байгуулагдах гэж байгаатай холбогдуулан ОУГЭ-ийн зүгээс тус байгууллагтай хамтран ажиллах стратеги, чиглэлийн талаар харилцан санал солилцож хамтран ажиллахаар ярилцлаа. Улс орны малчдын төлөөлөл тэр дундаас эмэгтэй болон залуу малчдыг туршлага солилцох уулзалт, зөвлөгөөнд хамруулах тал дээр хамтран ажиллахаар боллоо.

Монголын бэлчээр ашиглагчдын нэгдсэн холбоо нь гишүүдийнхээ дуу хоолойг дэлхий дахинд хүргэх зорилгоор олон улсын олон нийтийн байгууллагуудад нэгдэн гадаад харилцаа, хамтын ажиллагаагаа өргөжүүлж байна.