Олон улсын газрын эвсэл (International Land Coalition буюу ОУГЭ)-ийн захирал Марси Вигода, Азийн бүс хариуцсан зохицуулагч Ану Верна болон ОУГЭ-ийн Глобал бэлчээрийн зохицуулагч Наташа Мару нар 2025 оны 8-р сарын 13-22-ны өдрүүдэд манай улсад айлчилж байна.
Айлчлалын хүрээнд “Бэлчээр ба Нүүдлийн мал аж ахуй эрхлэгчдын Олон улсын жил” болон Цөлжилттэй тэмцэх тухай Нэгдсэн Үндэстний Байгууллагын Конвенцын талуудын 17 дугаар Бага хурал (COP 17) зэрэг томоохон арга хэмжээ зохион байгуулагдах гэж байгаатай холбогдуулан ОУГЭ-ийн зүгээс манай улстай хамтран ажиллах стратеги, чиглэлийн талаар санал солилцох зорилгоор нутгийн малчид болон малчдын хамтын байгууллага, бэлчээрийн менежментийн үйл ажиллагаатай танилцах ба төрийн болон олон улсын байгууллагуудтай уулзалт зохион байгуулах юм.
Уулзалт арга хэмжээг ОУГЭ-ийн гишүүн болох Монголын бэлчээр ашиглагчдын нэгдсэн холбоо, Газар зохион байгуулагчдын холбоо, Монголын хөдөө аж ахуйн хоршоологчдын үндэсний холбоо, Байгаль орчны Жасыл холбоо, Бодлого судлалын төвтэй хамтран зохион байгуулж байна.
.jpg)
1995 оны 11-р сард Олон улсын болон иргэний нийгмийн байгууллагууд Бельги улсын Бруссель хотноо цуглан өлсгөлөн болон ядуурлын асуудлаар хэлэлцсэн байна. Энэ үеэр хөдөөгийн хөгжилд тэгш эрхтэйгээр нэвтрэхийн ач холбогдлыг хуралд оролцогчид хүлээн зөвшөөрч, иргэний нийгэм ба Засгийн газар хоорондын байгууллагуудын эвсэл байгуулахаар шийдвэрлэсэн бөгөөд энэ нь Өлсгөлөн ба Ядуурлыг бууруулахад чиглэсэн эвсэл байсан юм. Хурлын оролцогч байгууллагууд хөдөө орон нутгийн иргэдийн газар, ус, нийтийн эзэмшлийн нөөц зэрэг хөрөнгийн хүртээмжийг илүү сайжруулснаар ядуурлыг бууруулах, тэдгээр иргэдийг орон нутгийн, үндэсний, олон улсын түвшинд оролцоогоо бэхжүүлэх, шийдвэр гаргахад нь тусалж эхэлсэн.
Харин 2003 онд Өлсгөлөн ба Ядуурлыг бууруулахад чиглэсэн эвслийн үйл ажиллагааны чиглэлийг өргөжүүлсэн, Ядууралгүй, газрын эрх ашиг хамгаалагдсан шударга, эрх тэгш, оролцоотой байдлыг дэлхий нийтэд бий болгох зорилго бүхий Олон улсын газрын эвсэл (ILC) байгуулагдаж, газар ашиглалтыг стратегийн түвшинд хүргэсэн юм. Өдгөө ILC нь дэлхийн хэмжээнд 97 улсын 323 гаруй байгууллагын төлөөлөлтэй болж, мэдлэг, туршлагаа хуваалцах, чадавхжуулах, мэдээлэл түгээх байдлаар хөдөө орон нутгийн иргэдийг тэгш эрхтэй, аюулгүй газар эзэмших боломжоор ханган ажиллаж байна.
Монголын бэлчээр ашиглагчдын нэгдсэн холбоо нь 2018 онд тус байгууллагад гишүүнээр элссэн ба өнөөдрийг хүртэл үр дүнтэйгээр хамтран ажиллаж байна.
.jpg)
